Gydag Eisteddfod Ceredigion wedi’i gohirio yn 2020 ac unwaith eto eleni, mae cynnyrch llenyddol y Brifwyl wedi’i gloi’n ddiogel, yn barod i’w anfon at y beirniaid ym mis Ebrill 2022. 

 
Ond gan fod y trefnwyr eisoes wedi derbyn y beirniadaethau ar gyfer Gwobr Goffa Daniel Owen, Eisteddfod Ceredigion ‘nôl ar gychwyn 2020, penderfynwyd gwobrwyo’r enillydd fel rhan o Eisteddfod AmGen er mwyn cefnogi’r diwydiant llyfrau.  Ac felly, daeth Lleucu Roberts yn enillydd y ‘dybl rhyddiaith’ am yr eildro yn ystod yr un wythnos eleni, yn dilyn ei llwyddiant yn Eisteddfod Genedlaethol Sir Gâr yn 2014.

Dyddiad cau

 
Rhagfyr 1af yw’r dyddiad cau ar gyfer y gystadleuaeth eleni, a rhoddir y Fedal Ryddiaith a gwobr ariannol o £750, er cof am Robyn a Gwenan Lewis gan y teulu, am gyfrol o ryddiaith greadigol heb fod dros 40,000 o eiriau, ar y pwnc, ‘Dianc’.  Y beirniaid eleni yw Meg Elis, Dylan Iorwerth ac Eurig Salisbury.
 
Mae’r holl wybodaeth, ynghyd â’r ffurflen gais ar gael i’w lawrlwytho ar wefan yr Eisteddfod, ac mae’n rhaid i bob cais gyrraedd swyddfa’r Eisteddfod yng Nghaerdydd erbyn 1 Rhagfyr.