Wedi'i ffurfio ym 1982 gan TUC Cymru, mae ein sefydliad wedi ymsefydlu ei hun fel asiantaeth ddatblygu fwyaf y DU ar gyfer cwmnïau cydweithredol, mentrau cymdeithasol a busnesau sy'n eiddo i weithwyr, gyda hanes cadarn o gyd-ddarparu prosiectau gwerth miliynau o bunnoedd sy'n adeiladu economi decach ac yn hyrwyddo cynhwysiant cymdeithasol a digidol.

Mae'n bryd mynd ar drywydd enw a brand newydd ar gyfer ein sefydliad er mwyn adlewyrchu pwy ydym ni heddiw ac i le rydym yn anelu. Ers deugain mlynedd, rydym wedi llwyddo i helpu pobl a chymunedau yn eu hymgais i greu swyddi, busnesau a chymunedau cydweithredol. Wrth i'r sefydliad dyfu, mae ein gwaith wedi ehangu ac arallgyfeirio.

Mae ein henw newydd yn dangos ein pennod nesaf fel asiantaeth ddatblygu sy'n gweithio ar gyfer newid economaidd a chymdeithasol. Byddwn yn aros yn driw i'n gwreiddiau cydweithredol wrth inni esblygu i ymateb i heriau a chyfleoedd newydd. Er y bydd ein ffocws bob amser yn aros yng Nghymru, rydym yn bwriadu cynyddu maint y gwaith a wnawn mewn rhannau eraill o'r DU.

Dywedodd Derek Walker Prif Weithredwr, Cwmpas

"Ers deugain mlynedd, rydym wedi llwyddo i helpu pobl a chymunedau yn eu hymgais i greu swyddi, busnesau a chymunedau cydweithredol"

Bydd yr ymdeimlad hwn o weithio gyda phobl, cymunedau a busnesau a'u helpu i gyrraedd lle maen nhw am fod, bob amser wrth wraidd ein hethos ac rydym yn llawn cyffro am ein dyfodol.

Mae gennym strategaeth newydd sydd wedi'i datblygu ochr yn ochr â'n henw newydd mewn ymateb i'r pwysau cymdeithasol, amgylcheddol ac economaidd digynsail a wynebir gan y wlad. Mae'r strategaeth hon yn nodi ein cynllun i helpu i adeiladu economi decach a gwyrddach a chymdeithas fwy cyfartal, lle mae pobl a'r blaned yn dod yn gyntaf.