Un o Glydach, Abertawe yw Beti-Wyn. Fe’i haddysgwyd yn Ysgol Gyfun Ystalyfera cyn mynd ymlaen i Goleg Diwinyddol Aberystwyth. Ordeiniwyd hi i’r weinidogaeth yn y Tabernacl, y Barri ac mae hi bellach yn weinidog ar Ofalaeth Eglwysi’r Priordy, Caerfyrddin, Cana a Bancyfelin. Hi hefyd yw Llywydd Undeb yr Annibynwyr Cymraeg ar hyn o bryd.

Urddwyd Beti-Wyn i’r Orsedd yn Eisteddfod Abertawe a’r Cylch 2006, a bu’n ffydlon i’w seremonïau ar hyd y blynyddoedd ers hynny. Bu’n ddistain yn Seremoni Gyhoeddi Eisteddfod Ceredigion ym mis Mehefin 2019, a chynorthwyodd yn y gwaith o drefnu ‘Gŵyl yr Orsedd’ yng Nghaerfyrddin yn 2019 i nodi 200 mlynedd ers uno Gorsedd y Beirdd â’r Eisteddfod. Roedd hi’n Is-Gadeirydd Eisteddfod Genedlaethol Sir Gâr 2014, a braint arbennig, meddai, oedd cael arwain yr Oedfa o lwyfan y Pafiliwn yn yr eisteddfod honno.

Meddai Beti-Wyn, “Rwyf wedi fy magu i werthfawrogi pwysigrwydd yr Eisteddfod Genedlaethol i fywyd ein cenedl, ac wedi’i mynychu’n flynyddol ers yn blentyn. Credaf fod yr Orsedd yn gyfrwng arbennig i hybu datblygu, hyrwyddo, a chyfoethogi’n diwylliant fel Cymry. Mae ei seremonïau yn lliwgar, urddasol a chyfoethog, a’i thraddodiadau’n rhai pwysig y mae angen eu diogelu. Rwy’n edrych ymlaen yn fawr at ymgymryd â chyfrifoldebau’r Arwyddfardd, ac yn ymwybodol iawn o’r fraint fawr a ymddiriedwyd i mi.”

Brwdfrydedd twymgalon

Dywedodd yr Archdderwydd Myrddin ap Dafydd, “Daeth yn amlwg wrth sgwrsio gyda hi fod awyrgylch ac arwyddocâd defodau’r Orsedd yn agos iawn at galon Beti-Wyn. Mae ganddi frwdfrydedd twymgalon ac rwy’n siŵr y bydd yn effeithiol ac ysbrydoledig wrth ei gwaith.”

Bydd yr Arwyddfardd newydd, a gaiff ei hadnabod yng ngorsedd fel yr Arwyddfardd Beti-Wyn, yn ymgymryd â chyfrifoldebau’r swydd ar ddiwedd wythnos Eisteddfod Ceredigion.